يوميات قارئ صحف: الأربعاء 27 يناير 2016
 
 

لحين عودة الزميل حسام بهجت؛ هايقرا الجرايد معاكم لمدة يومين: “قارئ صحف متطوع”.

الجولة النهارده هايبقى فيها تفاصيل عسكرية صغيرة نقلاً عن الصحافة الفرنسية ماحدش شافها، أو شافها ونفّض، عن صفقة سلاح نوعيّة جديدة للجيش، ده غير دخول الجيش في مجال المتاحف، وكمان 12 مليار جنيه صرفتهم الدولة لتصريف مياه الأمطار في محافظتين بس (آه والله!)، وعندنا طبعا خناقة بكري المستمرة مع ائتلاف “سيف اليزل” أو دعم الدولة، مرورًا بأخبار موجة البرد اللي ظلمنا فيها هيئة الأرصاد الجوية، وانفراج في أزمة الاستيراد/ الدولار اللي بدأت تخفّ شوية ودا كان المانشيت الرئيسي للشروق، وانتهاء بتجميعة من القضايا الأخلاقية اللي شغلت كتاب الرأي ومحرري الصفحات في الجرايد وتنوعت تغطيتها الإخبارية حسب مدرسة كل رئيس تحرير، بجانب طبعًا مساحات الحريّات الفكرية اللي بتضيق يوم عن يوم، مع خبر حبس الشاعرة والمترجمة، النباتية عدوّة الجزّارين، فاطمة ناعوت، قبل افتتاح معرض الكتاب بـ 24 ساعة في مفارقة لا تخلو من مأساة.
***

.. فإن همُ ذهبت أخلاقهم

فيديو بلالين الكاندومز اللي عمله شادي أبو زيد، الإعلام بيقدمه بـ «مراسل أبلة فاهيتا»، والممثل الشاب أحمد مالك، الفيديو كان فرصة مناسبة جدًا لإعادة التأكيد على النقاء الأخلاقي لمجموعة كبيرة من رؤساء التحرير وكتّاب أعمدة الرأي، وإن كان بعض الجرايد اكتفي بالتغطية الإخبارية العادية واعتذار أحمد مالك، مع التنفيض لموقف شادي على صفحته، زي البوابة، والوطن، والمصري اليوم، والأخبار اللي كان عندهم ما يكفي من الحصافة إنهم ما يفتحوش في الهجوم على شادي ومالك لإن واقعة “المرشد اتفتق” ما عدّاش عليها كتير. في حين جرنال زي اليوم السابع (في قصة مجمعة في العدد المطبوع فقط) أكّد، وبأشدّ العبارات، على أهمية الأخلاق الحميدة سواء في المانشيت الرئيسي بعنوان «ثورة الغضب ثأرًا للشرطة» وإطلاق حكم عام بإن «مواقع التواصل الاجتماعي» انتصرت لرجال الشرطة وطالبت بسجن مالك وزميله، أو في مقال الأستاذ الدندراوي اللي أطلق على “مالك” اسم ممثل الواقي الذكري وإنه (الممثل) عينة من إنتاج مصانع الملوثات الأخلاقية، وإن بيادة مجند الشرطة برقبته. وده تقريبًا نفس المعنى اللي أكد عليه حمدي رزق في المصري اليوم، مستعيدًا الاستشهاد بموضوع البيادة.. تاني.

المهم شادي ومالك ما اتقبضش عليهم، لكن طبعًا فيه ضدهم بلاغات من المحامي الشهير سمير صبري ومجموعة من ضباط الشرطة اللي مشاعرهم تأذّت من مشاهدة الكاندوم البالونة.

الأسف على ضياع الأخلاق في تغطية الخبر السابق ما ظهرش في خبر تاني مؤسف بجد نشرته البوابة منفردة: عريس وعروسة ماتا خنقًا ليلة الدُخلة. ولإن الموضوع مأساوي فأهالي قرية أتليدم بمحافظة المنيا، مسلمين بمسيحيين خرجوا لتشييعهم وحضور الصلاة عليهم، لكن الكنيسة الأرثوذكسية في القرية رجعّت الصندوقين وقالت: لأ.. دول بروتستانت (أقلية مسيحية في مصر تعتبر الكنيسة الأرثوذكسية المنتسبين إليها كفرة.. لا تجوز الصلاة عليهم)، الأهالي اللي اتصدموا من الموضوع وصل بيهم الأمر إنهم قالوا طيب هانصلي عليهم في الجامع (علشان قلب راعي الكنيسة الأرثوذكسية يحنّ؛ لكنه ما حنّش).

استمرارًا لمظاهر مكارم الأخلاق وفي خبر بنفس الصياغة تقريبًا وكأنه بيان صحفي؛ جرنال البوابة والمصري اليوم بشّرونا إن صفوت الشريف بيختم القرآن أسبوعيًا على هامش قضية الكسب غير المشروع المتهم فيها الشريف وولديه إيهاب (مخلى سبيله) وأشرف (هربان)، واللي تم حجزها للحكم نهاية مايو الجاي، مع إصرار المحامين على رفض التصالح مع الدولة. وإن رئيس مجلس الشورى الأسبق بيعاني من الموت.. المعنوي.

في نفس الوقت، وللحفاظ على نفس مكارم الأخلاق، كل الجرايد غطّت خبر منزوع الدسم عن حبس الشاعرة والمترجمة فاطمة ناعوت 3 سنين وغرامة 20 ألف جنيه (لسة فيه درجات تقاضي)، لكن مفيش ولا جرنال ربط بين الحبس والهجوم على هامش الحريات.. اللهم إلا جرنال المقال اللي أبرز الخبر في المانشيت الرئيسي بعنوان: «الدولة تحتفل بمعرض الكتاب بسجن إسلام بحيري وفاطمة ناعوت».. وبالمرّة همسة في أذن المسؤولين عن الجرنال: انتو “سارقين” اللوجو بتاع أهم موقع تحقيقات فرانكفوني في العالم، اسمه ميديا بار، ولازقينه جنب اسم جرنالكم.. مَا يصحش كده (!)
***

مانشيتات السقعة والـ 12 مليار جنيه

مش عارف إيه العلاقة بين موجات البرد اللي بتضرب البلد والمانشيتات العجيبة في الجرايد. بعد العنوان الشهير أبو إيموشن وش زعلان “غرقت تاني 🙁 ” في اليوم السابع، جرنال البوابة خرج بعنوان: رئيسي على صفحته الأولى: “الطقس بيتغابى” مش موجود على نسختهم الأون لاين. عمومًا جرنال الوطن عمل بروفايل عن الدكتور أحمد عبد العال، رئيس هيئة الأرصاد الجوية، بعد “حملات السفّ”، اللي اتضح إنها كانت ظالمة فعلًا، على تصريحاته قبل 25 يناير، بإن الأسبوع الموافق لذكرى الثورة هايبقى فيه موجة برد عنيفة.

التغطيات بتقول إن الجو هايستمر برد النهاردة وبكرة، وإن الموجة هاتبدأ تنكسر يوم الجمعة.. يا رب!

الأهرام رصدت الشلل اللي أصاب البلد بسبب الأمطار على صفحة كاملة، والحمد لله مفيش أي خسائر في الأرواح رغم إن المصري اليوم احتسب مصرع اتنين في حادثة سير باعتبارها حادثة طقس سيئ. لكن عندنا خبر عجيب وغريب في صفحة المحليات في الأهرام بيقول: “وقال المهندس إبراهيم سلمان، نائب رئيس هيئة مشروعات الصرف المغطى بوزارة الري والموارد المائية إن الخطة العاجلة التي نفذتها الحكومة في محافظتي الإسكندرية والبحيرة لمواجهة الأمطار بلغت تكلفتها 12 مليار جنيه، قد نجحت في الحد من مخاطرها (الأمطار) خلال النوة التي شهدتها البلاد الأسبوع الحالي”.. 12 مليار جنيه اتصرفوا على محافظتين فيهم شبكات صرف بالفعل موجودة؟.. فعلاً؟!
***

إخوان و6 أبريل

المصري اليوم والبوابة والشرق الأوسط السعودية اتكلموا عن مبادرة القرضاوي للمّ شمل الجماعة والصراع بين جناحي العنف وترشيد العنف، لكن الشروق، كالعادة، ليها النصيب الأوفر في التغطية بصفحة كاملة فيها عدد من التقارير عن مظاهرات الإخوان في ذكرى الثورة، وتصريح من أحد الشباب المنخرطين في الحراك على الأرض اللي اعتبر إن فعاليات ذكرى الثورة كانت مُرضية ليهم واعترافه بالمشاركة غير الواسعة، وفي نفس الوقت هاجم تصريحات المتحدث الرسمي للجماعة اللي قال إن فيه ٧٠٠ ألف مواطن تظاهروا في معظم محافظات مصر (حد شافهم؟)، وتصريح من البرلماني السابق طارق مرسي (مقيم في تركيا) بيهاجم فيه 6 أبريل وبيقول إنهم “ارتدوا طُرَح” وزالت عنهم القشرة الليبرالية بعد انصرافهم عن المشاركة في مظاهرات ذكرى الثورة.
***

لقينا ترزي البرلمان

القصة الرئيسية للمصري اليوم في “طبعته الأولى” كانت عن خطة التنمية الحكومية اللي هايتم إعلانها بكرة تحت اسم “مصر 2030″، يوم جمعة الغضب، والربط جاي من مصدر حكومي قال إن اختيار اليوم والمكان بالقرب من ميدان التحرير رسالة إننا هانقضي على الفقر والبطالة وتحقيق العدالة الاجتماعية خلال 15 سنة. الكاتب الصحفي الزميل نيوتن اتكلم عن نفس الخطة في مقاله بعنوان “للبلد أصحاب.. خاطبوهم” بيطلب فيه استعانة الحكومة بتجربة يوسف بطرس غالي في رفع موارد الضرائب قبل الثورة، وده كان في معرض كلامه عن أهمية استخدام “تكتيك يوسف بطرس” في تمرير قانون الخدمة المدنية. وعلشان التمرير يحصل، لازم ترزي. الأهرام بشرّتنا إنها لقت الترزي بتصريح على شمال الصفحة الأولى من المستشار مجدي العجاتي، وزير الشؤون القانونية ومجلس النواب، بيقول فيه إن (بعد رفض البرلمان للقانون) الحكومة اشتغلت على قانون جديد هاتخلصه بعد أسبوع، وإن النواب قالوا إن 90% من مواد القانون المرفوض جيدة علشان كده الحكومة هاتعدّل ما لا يزيد عن 15% (!).

وبالمرة جهاز الكسب غير المشروع هايبدأ يستقبل اقرارات الذمة المالية لنواب البرلمان، ونقلاً عن المصادر؛ فـ رئاسة الجمهورية والوزراء أول ناس قدموا إقرارات.. مع نبذة لطيفة من نفس المصدر قال فيها إن الرئيس الأسبق محمد مرسي رفض تقديم إقرار ذمة نهائي لإنه بيعتبر نفسه لسه رئيس جمهورية.

البوابة خرجت بمانشيت وحيد عن انهيار ائتلاف «سيف اليزل» بسبب مصطفى بكري اللي بيقول إنه هايشكّل ائتلاف تاني هايستقطب ليه نواب مستقلين.. ربّنا يهدّي سرّكم يا جماعة.
***

2016 عام الشباب

عدد من صحف اليوم زي المصري والأهرام والوطن نشرت خبر سماح وزارة الداخلية لحوالي 3500 طالب بآداء امتحانات نصف العام. وخبر، سيئ الصياغة والرائحة، من البوابة عن خلافات في المجلس القومي لحقوق الإنسان حول قائمة الـ 500 اللي هايخرجوا بعفو رئاسي علشان فيه أعضاء عاوزين مساجين مشاهير يخرجوا، بينما الدولة مش عاوزة المشاهير، حسب تصريح الدكتور صلاح سلام عضو المجلس.. عمومًا نجاة أي أسير حاجة كويسة.

الشروق بشّرنا إن النهارده هاينعقد مجلس تأديبي للطالب البرلماني الغشّاش بتاع التعليم المفتوح محسن أبو سمنة (طامية- الفيوم).
***

سلاح وسياحة

امبارح كان عندنا وفد عسكري باكستاني فيه رئيس هيئة الأركان المشتركة قابلوا وزير الدفاع صدقي صبحي، الأهرام وباقي الجرايد بيقولوا إنهم بحثوا التعاون في الصناعات العسكرية بين البلدين. وبمناسبة الصناعات العسكرية فيه خبر نشره الجرنال الاقتصادي الأسبوعي الفرنسي “لا تريبيون” بيقول في عدد امبارح إن العام الجاري هايشهد توقيع اتفاق بين مصر وشركة إير باص لبيع أقمار “تجسس”، والسعودية كمان هاتشتري.

خبر تاني في المصري اليوم والأخبار عن إطلاق تفاوض للحصول على قرض جديد من هيئة التعاون اليابانية (چايكا) بقيمة 350 مليون دولار، بعد الفلوس القديمة اللي دفعتها نفس الهيئة مَا اتبخرّت والمتحف لسة هيكل عظمي واليابانيين قافشين مَا يدفعوش فلوس تاني. لكن البوابة عملت قيمة مُضافة على نفس الخبر في نسختها المطبوعة بس للأسف، لما قالت إن “الرئيس عبد الفتاح السيسي شدد على ضرورة الانتهاء من المتحف الكبير دون تأخير وطلب من القوات المسلحة المشاركة في الاجتماعات مع الجانب الياباني”.

الرئيس ورئيس مجلس الشعب ركزوا في لقاء رئيس الدوما (البرلمان الروسي) على ملف عودة السياحة الروسي مصر في أقرب فرصة، ووزير الطيران المدني بيقول إنهم اتفقوا مع اللجنة الأمنية الروسية أن تكون إجراءات تفتيش الركاب على 5 مراحل، منهم 4 كشف بالإكس راي، ده غير التفتيش الدوري لأي موظف يدخل ويخرج من أي مطار.

بالمرة بما إن جت سيرة الرئيس، ف هو هايسافر إثيوبيا آخر الشهر وهايتفاوض مع رئيس الوزراء عن اللي بيحصل في سد النهضة. وعلى سيرة سد النهضة؛ مكرم محمد أحمد، نقيب الصحفيين الأسبق، كتب مقال في الأهرام عن دراسة من جامعة MIT، عن السد، وراح نشر نص الدراسة على صفحتين في الوطن.
***

حرب جديدة

يبدو إن الحرب في ليبيا هاتبقى قريبة جدًا، عندنا من امبارح وفد ليبي، مفيش غير الأخبار والبوابة اللي اتعاملوا مع الخبر، رغم أهمية اللي بيحصل في ليبيا وتأثيره مباشرة على مصر. بالتوازي مع ترتيبات سريعة زي إن: الاتحاد الأوروبي عاوز حكومة وحدة وطنية بأي شكل. ومصر كمان عاوزة الحكومة حتى لو هايكون فيها إخوان زي ما أعلن سامح شكري وزير الخارجية قبل كام يوم، وأمريكا عاوزاها بسرعة، ودول الخليج كمان. الوفد جاي لمصر من الجزاير اللي بتدفع المفاوضات بشدة لقدام، بالتزامن مع أخبار من مصادر مختلفة إن داعش بينقل نشاطاته لليبيا، غالبا كل ده بيحصل علشان الحرب الشاملة اللي هاتحصل بطلب من حكومة الوفاق اللي كل الأطراف مستعجلة عليها بأي شكل.

التركيز علي قصة ليبيا وشرح تفاصيلها كان حصرًا على جرنال الشرق الأوسط النهارده، سواء في التغطية الخبرية لمشاورات تشكيل حكومة الوفاق، أو حتي الإعلان عن نشر سلسلة من التقارير الكبيرة عن ليبيا بدأها النهاردة الصحفي عبد الستار حتيتة في الحلقة الأولى اللي خصصها للجماعات المسلحة، دواعش وقاعدة، في مناطق حقول النفط في أجدابيا وراس لانوف تحت اسم “يوميات الفوضى في ليبيا“. ده غير التغطية الخبرية اللي فيها تصريحات من الناطق الصحفي باسم رئيس الحكومة فائز السراج، اللي قال للمراسل إن الحكومة هاتخلص في خلال ١٠ أيام رغم المشاكل، مع تصريح إيطالي بإنهم مستعدين للقيام بعمل عسكري بشرط وجود طلب رسمي من الحكومة، مع تكثيف الرحلات الاستطلاعية اللي بتقوم بها الطائرات الأمريكية لرصد مواقع داعش.

فيه كمان مقال لحسن أبو طالب في الوطن عن سيطرة المسلحين على الأرض وتهديدهم مصر. المقال عبارة عن تعليق على موضوع نشرته الشرق الأوسط السعودية، قبل يومين، وأوردت فيه وثائق عن تنسيق بين فرقاء إسلاميين في ليبيا للإطاحة باتفاق الصخيرات.

استمرارًا للحروب، فيه حرب الوكالة اللي شغالة بقوة بين إيران والسعودية، في سوريا واليمن والعراق ولبنان، مهم تقراها على صفحات الشرق الأوسط والحياة السعوديتين، والسفير والأخبار اللبنانيتين.. كل فريق بيستخدم أسلحته الصحفية. الشرق الأوسط عاملة صفحة أولى عن حرب الوكالة فيها تصريح القرضاوي اللي أعلن فيه ندمه عن محاولاته السابقة التقريب بين السنة والشيعة، وبيقول إن علماء السعودية كان عندهم حق. وخبر رئيسي الصفحة الأولى عن أذرع إيران في باكستان كإشارة لملف علي صفحتين جوا الجرنال، والحجب اللي عمله الحوثيين ضد موقع الجرنال في اليمن. والحياة اتكلمت عن أزمة مفاوضات چينيڤ وحرب القوائم بين روسيا وتركيا، في مقابل افتتاحية السفير بعنوان “السعودية: إيران عدو مثالي”. وطبعا أحد مظاهر حرب الوكالة هي انتخابات الرئاسة اللبنانية، اللي اتكلمت عنها الأخبار وإن ترشيح حزب الله لميشيل عون مش محتاج تكرار وإعادة تاكيد كل شوية.
***

كله ثقافة وعلوم وفنون

غير خبر حبس فاطمة ناعوت، فـ ماحدش اهتم بعمل شغل بالتوازي مع افتتاح معرض الكتاب النهاردة غير جرنالي المقال والبوابة.. مش أعظم حاجة لكن أحسن من مفيش.

وبمناسبة المعرض ف عندنا حاجة لإتنين مترجمين مصريين مهمين كتب عنهم جرنال الحياة: سمير جريس عامل أول كتاب نقدي بالعربية عن الأديب الألماني جونتر جراس، منشورات الكتب خان. وإيهاب عبد الحميد اللي ترجم رواية الروائي الأفغاني الشهير خالد الحسيني بعنوان «ورددت الجبال الصدى»، منشورات بلومزبيري قطر. أشهر عمل لخالد الحسيني رواية اتحولت لفيلم بنفس الاسم غالبا سمعتوا عنه «عدّاء الطائرة الورقية».

خبرين مؤسفين، إن الممثلة فيروز، أو الطفلة المعجزة «دهب» في حالة صحية حرجة واتنقلت للمستشفى حسب البوابة. والتاني منشور في الوطن إن غادة نافع بنت الممثلة ماجدة الصباحي (عمو عزيز) كسبت قضية حجر على أمها بسبب الألزهايمر، خَرَف الشيخوخة.

فيه حوار جميل، لولا تدخلات مفيد فوزي، في المصري اليوم، مع الدكتور محمد عبد الوهاب زوج فاتن حمامة بيكشف علاقته المستمرة حتى الآن بسيدة الشاشة، فناجين قهوة وبورتريهات والكرسي بتاعها.
الأهرام نشرت منفردة خبر وفاة عالم البرمجيات المصري الشهير الدكتور نبيل عبد العزيز (برمجيات صخر الشهيرة لأطفال التسعينيات) استعرضت في خبر التأبين مسيرته اللي بدأت عسكرية مع تطويرات دخلها في الطائرة السوخوي قبل إيفاده دارسا في الاتحاد السوڤيتي السابق، وطبعًا دوره كمدير لمشروع صخر للكومبيوتر.

لمتابعي المسلسلات ومحبي وودي آلن؛ ده مش خبر جديد قوي.. الجديد: هو إن الراجل اختار بالفعل نجمة البوب الشهيرة مايلي سايرس لبطولة أول شغل ليه في الدراما التليفزيونية حسب جرنال الحياة.

اعلان