يوميات قارئ صحف: الثلاثاء 25 أغسطس 2015

أغلى شئ بيملكه أي جرنال هو مصداقيته في عين القارئ، سواء كان قارئ عادي أو متخصص أو مسئول أو زميل صحفي. المصداقية دي بتتبني على مدار فترة طويلة من التغطية الطازجة والعميقة والمفيدة للقارئ، اللي بيبدأ يكوّن علاقة ثقة ممكن تصل حتى للصداقة مع بعض أسماء الصحفيين بعد ما يطمئن أن عندهم مصادر قوية، وبيجيبوا له الخبر اليقين اللي بيثبت بعدها بالتجربة أنه خبر صحيح. الخاطر ده جه على بالي النهارده لما شفت العنوان الرئيسي للشروق: “انفراد.. 7 مجموعات إخوانية تبايع «داعش»” عن انشقاق بعض مجموعات الإخوان اللي زهقوا من إصرار قيادات الجماعة على “السلمية” وقرروا ينضموا لتنظيم الدولة الإسلامية وشوية تفاصيل عن محاولات قيادات الجماعة احتواء الموقف عشان ميوسعش. فكرت أن الخبر ده بالعنوان ده لو كنت شفته في اليوم السابع ولا البوابة ولا الوطن ولا حتى المصري اليوم كنت هاخد بالي منه لكن هاكون حريص إني متعاملش معاه على أنه خبر حقيقي لغاية ما اتأكد من مصدر مستقل وموثوق. لكن لأن الخبر عليه اسم محمد خيال مسئول ملف الإخوان في الشروق، ومع إني عمري ما قابلته ولا كلمته لكن على مدى سنوات من قراءة الشروق أصبح عندي كقارئ انطباع أن مصادره قوية وأنه مش بيألف ولا بيحبّش، وبالتالي اعتبرت الخبر صحيح ومُقلق إلى أن يثبت العكس من مصدر بنفس القوة. ده رأس مال الجرنال الحقيقي.

نفس الشئ ينطبق على تغطية الشروق للتشريعات وأحكام المحاكم. كنت قلت لكم قبل كده إني بانتظر أشوف القسم القضائي هيقول إيه علشان أفهم أي قانون جديد أو حكم مهم وسياق وتاريخ الأحكام والقوانين دي. فمن ساعة ما السيسي طلع امبارح تعديل لقانون الكسب غير المشروع انتظرت صدور الشروق عشان تشرح لي الموضوع كويس وأملي لم يخب. النهارده 4 مواضيع مختلفة بتشرح لي كقارئ كل أبعاد الموضوع: تقرير بيلخص لي مواد القانون ويحللها: “تعديلات «الكسب غير المشروع» تتيح التصالح فى الجريمة حتى النهاية“، وتقرير بيشرح التعديلات دي هتفيد مين أكتر ناس وطالعة ليه؟ “مبارك ونجلاه و10 من رموز نظامه أبرز المستفيدين من تعديلات «الكسب غير المشروع»”، وتقرير بيستطلع آراء قضاة متخصصين في التعديل الجديد: “قضاة سابقون فى جهاز «الكسب» يرفضون «التعديلات التصالحية»“، وتقرير بيحط لنا القانون الجديد في سياق كل تشريعات التصالح في جرائم المال اللي صدرت السنة دي عشان نفهم الصورة الأكبر: “تشريعات 2015 ترفع شعار «التصالح مقابل المال هو الحل»”. بس خلاص أنا كده فهمت الموضوع من كل جوانبه وجاهز كقارئ غير متخصص أكوّن موقف من القانون الجديد.

———-

هنفضل مع الشروق في بداية الجولة لأن عدد النهارده حلو قوي: عندنا ملف على صفحة كاملة عن انتهاء أزمة إضراب أمناء الشرطة في الشرقية من ضمن مواضيعه أول حوار مع مدير أمن الشرقية بعد انتهاء الأزمة، وتقرير عن كل مظاهرات أمناء الشرطة من ثورة يناير حتى الآن. وتحقيق ميداني طويل عنوانه: “«الشروق» فى قلب صحراء الفرافرة.. مستقبل مصر يبدأ من هنا”. وتقرير عن مشكلة أكاديمية بيعاني منها عالم مصري مفصول: “«الشروق» تحقق فى وقائع اغتيال علمى لـ«نيوتن مصر» بجامعة 6 أكتوبر”. وتغطية لجلسة محاكمة مرسي في قضية التخابر امبارح اللي استمعت فيها المحكمة لشهادة مدير الأمن العام السابق أحمد حلمي. وحكم السجن المشدد 20 سنة على القيادي الإخواني محسن راضي وآخرين في أحداث “شغب بنها”. وطبعا تغطية لتفجير أوتوبيس الشرطة في البحيرة امبارح. ووفاة أمين الشرطة اللي انضرب بالرصاص في الفيوم الأسبوع اللي فات. وتقرير “أصحاب المنازل المضارة من تفجير الأمن الوطنى فى شبرا: بيوتنا اتخربت وننتظر تعويضات الحكومة”. وخبر “القبض على أدمن صفحة «نسور الحرية» لإعلانهم مسؤوليتهم عن أعمال تخريبية في البلاد”. وإحالة مؤسس حركة “طلاب ضد الانقلاب” في جامعة حلوان لمحكمة الجنايات. وتقرير عن إنشاء قطاع جديد لحقوق الإنسان في وزارة الخارجية بدل الوضع الحالي اللي هو مجرد إدارة جوه قطاع تاني هو العلاقات الدولية متعددة الأطراف، وأنباء عن أن القطاع الجديد هتمسكه السفيرة ليلى بهاء اللي كانت مديرة إدارة حقوق الإنسان في الخارجية في الشهور اللي بعد ثورة يناير. وبالمناسبة، هي شقيقة زياد بهاء الدين نائب رئيس الوزراء السابق. التقرير كتبته دينا عزت اللي عمري ما بالاقي تقاريرها على بوابة الشروق. فيه كمان تقرير عن عودة حمدين صباحي للأضواء بمحاولة تكوين “اتحاد ديمقراطي” يخوض الانتخابات ولفت نظري فيه انه لما اتسأل عن موقفه من حملة حل الأحزاب الدينية أجاب: “إننا نؤمن بحق كل المصريين في التعبير عما يؤمنون به” (في الوطن صفحة كاملة عن مبادرة صباحي الجديدة). في الاقتصاد خبر: “«أبراج» الإماراتية تخطط للاستحواذ على حصص بشركات في مصر وشمال أفريقيا”. وانفراد بأول حوار مع مسئول شركة دي دبليو تي الأمريكية اللي فازت بعقد الترويج السياحي لمصر. وتغطية لتواصل انهيار البورصة المصرية مع حوار مع رئيس البورصة. فيه كمان ملخص مترجم لمقال من هآرتس الإسرائيلية عنوانه “هل ستصبح حماس شريك السلام الجديد”. وملخص مترجم لمقال الإندبندنت البريطانية عن محاولات مصر جمع تبرعات لمنع بيع تمثال سخم كا في لندن (الأصل الإنجليزي هنا). وزياد بهاء الدين كتب مقاله الأسبوعي بعنوان “ماذا وراء احتجاج موظفى الدولة وأمناء شرطة الشرقية؟”. عدد دسم جدا وعايزين من ده على طول.

———-

التحرير أخيرا نشرت خبر أن صاحبها هيقفلها آخر الشهر بعد ما الخبر اتنشر في كل حتة تانية: النهارده على الصفحة الأولى بيان مجلس إدارة التحرير بخصوص إغلاق الصحيفة الورقية. بالمناسبة وائل عبد الفتاح بيكتب في عموده اليومي سلسلة بعنوان “ماذا يحدث في الإعلام” النهارده الحلقة الثالثة. وخبر ان وزير الأوقاف شطب اسم زوجته وبنته من قوائم بعثة الحج السنة دي بعد التحرير ما كشفت الموضوع من يومين. وملف خاص عن إضراب أمناء الشرطة من محتوياته تقرير عنوانه: “6 قوانين خرقها إضراب أمناء الشرطة على رأسها «الإرهاب» و«البلطجة»” وملف تاني على صفحتين عن انتفاضة لبنان.

———-

المصري اليوم النهارده طلعت بعنوان جرئ: “لفريق حمدى وهيبة رئيس أركان حرب القوات المسلحة الأسبق لــ«المصري اليوم»:السيسى له رصيد كبير فى الشارع لكنه ارتكب أخطاء مثل «مبارك ومرسى»” أعتقد دي أول مرة أشوف في الجرايد المصرية حد عسكري بيقول ان السيسي بشر زينا وبيغلط. فيه حوار مع أكمل قرطام بيقول الأمن والحكومة ملهمش أي علاقة بقراره بإغلاق جرنال التحرير. وملف خاص عن العلاقات المصرية الروسية بمناسبة زيارة السيسي لموسكو النهارده. وتغطية برضو لانتهاء إضراب الامناء في الشرقية بـ”تعهدات عليا” وحوار فكاهي مع مدير أمن الشرقية السابق عن شخصية أبو جبل اللي كانوا عايزين يشيّلوه الليلة. ومسودة قانون المسئولية الطبية اللي نقابة الأطباء كتبته وهتقدمه للحكومة.

———-

الوطن نقلت عن متحدث باسم الجيش الليبي عن إصابة هشام عشماوي ضابط الجيش المصري السابق اللي بيقولوا انه كان العقل المدبر لاغتيال النائب العام وهو بيحارب في درنة في شرق ليبيا. وسكرتير عام نقابة الصحفيين بيقول ان النقابة بتعمل اتصالات لمنع إغلاق جريدة التحرير. و”أهالي الصيادين المحتجزين بالسودان يتهمون «محلب» بالتقصير”. وخبر مهم أن “جهات سيادية أبلغت مجلس إدارة منجم السكري بتعيين مندوب مالي حكومي، لأول مرة، للإشراف علي الإدارة المالية للمنجم، ومتابعة سير الإجراءات به، ومعرفة معدلات الإنتاج، وقيمة الأرباح السنوية، نتيجة كثرة المخالفات المالية، في ظل مراقبة المشرفين الذين تستعين بهم الشركة، بعيداً عن الحكومة”. وتقرير جديد صدر عن “مؤشر الديمقراطية”: 807 احتجاجات بالجامعات والمدارس خلال 8 أشهر”. وده كمان مهم: “قانونيون: ضبط 3 روجوا لأفكار متطرفة أول تطبيق لـ«قانون الإرهاب»” عن القبض على 3 من مستخدمي الانترنت في سوهاج. و”القبض على 37 من قيادات الإخوان الوسطى فى 3 محافظات”. وكل الجرائد نشرت عن الموضوع ده: “مصادر رئاسية تكشف لـ”الوطن” كواليس 3 وقائع نصب باسم مدير مكتب السيسي“. وملف برضو عن احتجاج أمناء الشرطة منه تفاصيل 4 ساعات من التفاوض لإنهاء الأزمة. فيه كمان تقرير عن موازنة مدينة الإنتاج الإعلامي لسنة 2015. وناجح إبراهيم يواصل الكتابة عن خطورة سجن الآلاف حاليا على مستقبل البلد.

———-

اليوم السابع لليوم التالي على التوالي أكتر جرنال زعلان من إضراب أمناء الشرطة وبيزعق لهم باسم وزارة الداخلية في ملف كبير النهارده وأغلب مقالات الرأي. وخبر “إحالة إمام مسجد لمحاكمة عاجلة لاتهامه بهتك عرض طفلة أثناء تحفيظها القرآن” في قطور الغربية.  و”حملات مكثفة لتأمين الحدود الغربية بعد تدهور الأوضاع بليبيا.. مصدر: مراقبة جوية على مدار الساعة.. ومروحيات هجومية للتصدى للإرهابيين والمتسللين.. وحرس الحدود يحاصر طرق سيوة لاصطياد المهربين”.

———-

في البوابة النهارده صفحة عنوانها: “نفراد يكشف جانبًا من التاريخ الذى لا يعرفه أحد لأول مرة.. أسرار من الأوراق الخاصة لأمن الدولة“، اقراه من باب التسلية، بس متصدقهوش بشكل آلي، عشان في الآخر لازم تفتكر إنك بتقرا البوابة لرئيس مجلس إدارتها وتحريرها عبد الرحيم علي. “مصادر رئاسية تنفي تدخل المؤسسة في وقف اصدار الصحف”. و”بالأسماء.. “البوابة” تنفرد بنشر الحركة الكاملة لمساعدي “الزند”. و”الإمارات تنهي التعاقد مع 38 إمامًا إخوانيًا” رشحهم الأزهر. وخبر مهم: “الخارجية (المصرية) تنهى اعتماد السفير الليبي وتمهله 72 ساعة لمغادرة القاهرة”. وحوار مع مندوب ليبيا في جامعة الدول العربية في القاهرة. خد بالك ان البوابة الورقية النهارده فيها خبر مش موجود على الموقع عنوانه: “طيران مجهول يقصف داعش في سرت”. افتكر الخبر ده عشان جايز نحتاج نرجع له قريب. والسيد ياسين كتب مقال هنحتفظ بيه في أرشيفه عنوانه: “القصة المزيفة لاعتصام رابعة المسلح!”

———-

باعتذر أني معرفتش أكتب لكم امبارح لظروف السفر لمنطقة نائية شويتين باكتب لكم النهارده منها وهاكون فيها الكم يوم الجايين. نجحنا النهارده في العثور على أغلب الجرايد، فالمفروض اليوميات تفضل منتظمة لحد ما أرجع. بس ملقيتش الحياة والشرق الأوسط والجرايد الاقتصادية فهتضطروا تزوروا مواقعهم بنفسكم أو تشتروهم لحد ما أرجع أو ألاقيهم هنا.

———-

شكرا لكل من كتبوا وأواصل تلقي ترشيحاتكم ومقترحاتكم وتصويباتكم وتعليقاتكم على hossambahgat1@gmail.com

اعلان